തിരഞ്ഞെടുപ്പ് ചൂടിൽ ചക്കരക്കുടം; സ്ഥാനാർത്ഥിയായി മഞ്ജു വാരിയർ.

മഞ്ജു വാര്യരും സൗബിന്‍ ഷാഹിറും പ്രധാന കഥാപാത്രങ്ങളായെത്തുന്ന ‘വെള്ളരിപട്ടണ’ത്തിന്റെ ആദ്യ ക്യാരക്ടര്‍ ഷോർട് വീഡിയോ റിലീസ് ചെയ്തു.   തിരഞ്ഞെടുപ്പ് ചൂടിലായ തൃക്കാക്കര പോലെ, തിരഞ്ഞെടുപ്പിനൊരുങ്ങുന്ന ചക്കരക്കുടമെന്ന ഗ്രാമമാണ് വീഡിയോയിൽ കാണാൻ സാധിക്കുന്നത്. കൂടാതെ ചക്കരക്കുടത്തെ  പ്രധാന സ്ഥാനാര്‍ഥിയായ, മഞ്ജു വാര്യർ അവതരിപ്പിക്കുന്ന കെ.പി.സുനന്ദയും വീഡിയോയിലെത്തുന്നുണ്ട്. ലഘുവിവരണം ഉള്‍ക്കൊള്ളുന്നതാണ് ക്യാരക്ടര്‍ വീഡിയോ.

മോഷന്‍ പോസ്റ്റർ ക്യാരക്ടര്‍ പോസ്റ്റർ, എന്നിവയിലൂടെ കഥാപാത്രത്തെ അവതരിപ്പിക്കാറുണ്ടെങ്കിലും വിവരണ സഹിതം ഷോർട് വീഡിയോയിലൂടെ കഥാപാത്രത്തെ അവതരിപ്പിക്കുന്നത് ഇതാദ്യമായാണ്. ഇത്തരത്തില്‍ ഒരു സാധ്യത കൂടി മുന്നോട്ട് വയ്ക്കുകയാണ് ‘വെള്ളരിപട്ടണം’. മഹേഷ് വെട്ടിയാർ സംവിധാനം നിർവഹിക്കുന്ന ‘വെള്ളരിപട്ടണം’ ഫുള്‍ ഓണ്‍ സ്റ്റുഡിയോസാണ് നിര്‍മ്മിക്കുന്നത്. മാധ്യമപ്രവര്‍ത്തകനായ ശരത് കൃഷ്ണനും മഹേഷ്‌ വെട്ടിയാറും ചേര്‍ന്നാണ് ചിത്രത്തിന്റെ രചന നിർവഹിച്ചിരിക്കുന്നത്.

സലിംകുമാര്‍, സുരേഷ്‌ കൃഷ്ണ, കൃഷ്ണ ശങ്കര്‍, ശബരീഷ് വര്‍മ്മ, അഭിരാമി ഭാര്‍ഗവന്‍, കോട്ടയം രമേശ്, മാല പാര്‍വതി, വീണ നായര്‍, പ്രമോദ് വെളിയനാട് തുടങ്ങിയവരാണ് ‘വെള്ളരിപട്ടണ’ത്തിലെത്തുന്ന മറ്റ് താരങ്ങൾ.  ജയേഷ് നായർ ‘വെള്ളരി പട്ടണ’ത്തിന്റെ ക്യാമറ കൈകാര്യം ചെയ്തിരിക്കുന്നു. സച്ചിന്‍ ശങ്കര്‍ മന്നത്ത് സിനിമയുടെ സംഗീത സംവിധാനം നിർവഹിക്കുന്നു. അപ്പു എൻ ഭട്ടതിരിയാണ്  ‘വെള്ളരി പട്ടണ’ത്തിന്റെ എഡിറ്റിംഗ് ചെയ്തിരിക്കുന്നത്.